20 – 21-nji maýda Naberežnyýe Çelny döwlet mugallymçylyk uniwersitetinde (Russiýa Federasiýasy, Tatarystan Respublikasy) «Bilim: anyk ýagdaýlar we mümkinçilikler» atly XIV halkara açyk mugallymçylyk forumy geçirildi.

Forumyň maksady: bilimiň hilini ýokarlandyrmagyň esasy serişdesi hökmünde bilim ulgamynda mugallymlaryň hünär başarnyklaryny kämilleşdirmek meseleleri boýunça esasy alymlaryň we amalyýetçileriň özara gatnaşyk etmeginden, ýerli we daşary ýurtlaryň mugallymçylyk toparlarynyň innowasion tejribesini baýlaşdyrmakdan ybarat boldy.

Foruma RF-niň Bilim ministrliginiň, RF-niň Ylym we ýokary bilim ministrliginiň, Tatarystan Respublikasynyň Bilim we ylym ministrliginiň, Russiýanyň mugallymçylyk ýokary okuw mekdepleriniň we kollejleriniň, Türkmenistanyň, Alžiriň, Belarusuň, Gazagystanyň, Tunisiň, Azerbaýjanyň, Wýetnamyň, Özbegistanyň ylym we bilim ulgamlarynyň wekilleri gatnaşdylar.

Milli bilim institutynyň direktory Baýram Bäşimowyň ýolbaşçylygyndaky wekiliýet biziň ýurdumyza wekilçilik etdi. Şeýle hem wekiliýetiň düzümine Döwletmämmet Azady adyndaky Türkmen milli dünýä dilleri institutynyň mugallymlary J.Ilamanowa hem-de L.Geldiýewa girdiler.

Çäre başlanmazdan ozal, oňa gatnaşyjylar Aýaz Gilýazow adyndaky Tatar drama teatrynda guralan mugallymçylyk bilimi ulgamyndaky innowasiýalara we üstünliklere bagyşlanan sergä aýlandylar.

Forumyň umumy mejlisinde Naberežnyýe Çelny döwlet mugallymçylyk uniwersitetiniň rektory Alfinur Galiakberowa, Tatarystan Respublikasynyň bilim we ylym ministriniň birinji orunbasary R.Muzipow, Naberežnyýe Çelny şäheriniň munisipal biliminiň Ýerine ýetiriji komitetiniň ýolbaşçysynyň orunbasary W.Harisow gutlag sözi bilen çykyş etdiler.

Türkmenistanyň milli bilim institutynyň direktory B.Bäşimow guramaçylary we çärä gatnaşyjylary forumyň açylmagy bilen gutlady we hemmelere netijeli işi arzuw etdi. Ol Türkmenistan üçin ýokary hünär derejeli mugallym işgärleriň taýýarlanylmagyna Naberežnyýe Çelny döwlet mugallymçylyk uniwersitetiniň uly goşandyny belledi. «Berkarar döwletiň täze eýýamynyň Galkynyşy döwründe Türkmenistanda ýaşlaryň taryhy bilimini we watançylyk terbiýesini kämilleşdirmegiň esasy ugurlary» atly çykyşynda B.Bäşimow taryhy bilimiň ösüşi, Türkmenistanyň bilim edaralary üçin mugallymlary taýýarlamak, şeýle hem ýaşlary watançylyk taýdan terbiýelemek babatda gazanylanlar barada giňişleýin gürrüň berdi.

Forumyň işi: «Mekdebe çenli we başlangyç bilimiň psihologik-mugallymçylyk meseleleri we mümkinçilikleri», «Köpmedeniýetli giňişlikde rus dili we edebiýaty», «Sanlylaşdyrma döwründe matematikany, fizikany we informatikany okatmagyň häzirki zaman çemeleşmeleri we tehnologiýalary», «Beden taýdan terbiýelemegi ösdürmegiň hem-de ýaşaýyş-durmuşyň howpsuzlygynyň möhüm meseleleri we geljekki ösüşi», «Dünýäniň özgerýän şertlerinde daşary ýurt dilini okatmak», «Häzirki zaman taryh bilimi: umumyrussiýa meňzeşliginiň kemala gelmegi» diýen bölümçe mejlisleriň altysynda dowam etdi.

Şol bölümçe işleriniň çäklerinde Döwletmämmet Azady adyndaky Türkmen milli dünýä dilleri institutynyň mugallymlary ylmy çykyşlary hem-de işläp taýýarlamalary bilen tanyşdyrdylar.

«Bilimde sanly tehnologiýalar» atly halkara okuw maslahatynda Naberežnyýe Çelny döwlet mugallymçylyk uniwersitetiniň mugallymlary wirtual okuwyň nusgasyny döretmegiň tehnologiýalaryny görkezdiler, şonda geljekki mugallymlar sanly simulýatorda zerur bolan mugallymçylyk başarnyklaryny döretmek mümkinçiligini alýarlar.

«Russiýanyň we Türkmenistanyň halklarynyň ertekileri boýunça wideomateriallary ulanmagyň usulyýet ugurlary» diýen «tegelek stoluň» dowamynda maslahatlaşmalar işjeň häsiýete eýe bolup, şonda B.Bäşimow bilermen hökmünde gatnaşdy.

Forumyň çäklerinde B.Bäşimow Naberežnyýe Çelny döwlet mugallymçylyk uniwersitetinde bilim alýan türkmen talyplary bilen hem duşuşyk geçirdi.

Biziň ýurdumyzyň wekilleriniň bu foruma gatnaşmagy Türkmenistanyň hem-de Russiýa Federasiýasynyň ýokary okuw mekdepleriniň we ylmy edaralarynyň arasynda ylym-bilim hyzmatdaşlygyny ösdürmekde we pugtalandyrmakda möhüm ädim boldy.