Ýurdumyzyň bilim edaralarynyň we pedagogik işgärleriniň arasynda Türkmenistanyň Bilim ministrligi tarapyndan yglan edilen her ýyl geçirilýän bäsleşikleriň jemleýji, döwlet tapgyrynyň netijeleri jemlenildi.
15 ugur boýunça geçirilen uly bäsleşiklere ýurdumyzyň dürli künjeklerinden bilim ulgamynyň wekilleri işjeň we mynasyp gatnaşdylar.
Bäsleşikleriň dowamynda oňa gatnaşyjylaryň hödürlän dürli materiallarynyň we işleriniň esasynda ýurduň bilim edaralarynyň we pedagogik işgärleriniň bitiren hyzmatlary, gazanan üstünlikleri, tejribeleri, terbiýeçilik we halypaçylyk, mugallymçylyk, ylmy we döredijilik işleri giňden görkezildi.
Bäsleşige gatnaşyjylaryň işlerine abraýly eminler baha berdiler. Eminleriň düzümine döwlet edaralarynyň we jemgyýetçilik guramalarynyň, şol sanda Türkmenistanyň Milli bilim institutynyň, Seýitnazar Seýdi adyndaky Türkmen döwlet mugallymçylyk institutynyň, Türkmen döwlet medeniýet institutynyň, Aman Kekilow adyndaky Mugallymçylyk institutynyň, Hydyr Derýaýew adyndaky Mugallymçylyk institutynyň, «Türkmenistan» we «Mugallymlar gazeti» gazetleriniň, «Bilim» ylmy-usuly žurnalynyň hem-de Türkmenistanyň Kärdeşler arkalaşyklarynyň Milli merkeziniň esasy hünärmenleri girdiler.
Bäsleşikleriň jemleýji, döwlet tapgyrynyň netijeleri boýunça Gran-pri baýragyny eýelän ýeňijiler hökmünde aşakdakylar yglan edildi:
– «Iň gowy çagalar bagy» bäsleşiginde Balkan welaýatynyň Türkmenbaşy etrabyndaky 14-nji çagalar bagy;
– «Iň göreldeli çagalar bagynyň müdiri» bäsleşiginde Mary welaýatynyň Mary etrabyndaky 2-nji çagalar bagynyň müdiri Sähragül Akmämmedowa;
– «Iň göreldeli terbiýeçi-usulyýetçi» bäsleşiginde Daşoguz welaýatynyň Daşoguz şäherindäki 31-nji çagalar bagynyň terbiýeçi-usulýetçisi Mähri Abdyweliýewa;
– «Iň gowy topar otagy» bäsleşiginde Daşoguz welaýatynyň Daşoguz şäheriniň daşary ýurt dilleri çuňlaşdyrylyp öwredilýän ýöriteleşdirilen 39-njy çagalar bagynyň terbiýeçisi Mähri Ermetowa;
– «Iň gowy mekdep» bäsleşiginde Daşoguz welaýatynyň Daşoguz şäheriniň iňlis dili çuňlaşdyrylyp öwredilýän ýöriteleşdirilen 29-njy orta mekdep;
– «Iň göreldeli mekdep müdiri» bäsleşiginde Mary welaýatynyň Mary şäherindäki 27-nji orta mekdebiniň müdiri Jahan Saparmyradowa;
– «Mekdep müdiriniň iň göreldeli okuw-terbiýeçilik işleri boýunça orunbasary» bäsleşiginde Arkadag şäheriniň iňlis dili çuňlaşdyrylyp öwredilýän ýöriteleşdirilen 3-nji orta mekdebiniň müdiriniň okuw işleri boýunça orunbasary Bagtygül Pudakowa;
– «Mekdep müdiriniň iň göreldeli terbiýeçilik işleri boýunça orunbasary» bäsleşiginde Mary welaýatynyň Mary şäherindäki 24-nji zehinli ýaşlar mekdebiniň müdiriniň terbiýeçilik işleri boýunça orunbasary Gülendam Gylyçlyýewa;
– «Iň göreldeli synp ýolbaşçy» bäsleşiginde Daşoguz welaýatynyň Daşoguz şäheriniň daşary ýurt dilleri çuňlaşdyrylyp öwredilýän ýöriteleşdirilen 25-nji orta mekdebiniň başlangyç synplaryň mugallymy Merjen Saparowa;
– «Iň gowy synp otagy» bäsleşiginde Daşoguz welaýatynyň Daşoguz şäheriniň daşary ýurt dilleri çuňlaşdyrylyp öwredilýän ýöriteleşdirilen 25-nji orta mekdebiniň başlangyç synplaryň mugallymy Amangül Sopyýewa;
– «Iň göreldeli aýdym-saz mugallymy» bäsleşiginde Balkan welaýatynyň Gyzylarbat etrabyndaky 18-nji çagalar bagynyň aýdym-saz mugallymy Baýrammyrat Keljäýew;
– «Iň gowy mekdep kitaphanasy» bäsleşiginde Aşgabat şäheriniň daşary ýurt dilleri çuňlaşdyrylyp öwredilýän ýöriteleşdirilen 145-nji orta mekdebiniň kitaphanasy;
– «Iň gowy mekdep sport zaly» bäsleşiginde Daşoguz welaýatynyň Daşoguz şäherindäki 29-njy orta mekdebiniň sport zaly;
– «Iň göreldeli mekdepden daşary çagalar edarasy» bäsleşiginde Daşoguz welaýatynyň Akdepe etrabyndaky Çagalar we ýetginjekler döredijilik öýi;
– «Iň göreldeli gurnak ýolbaşçysy» bäsleşiginde Daşoguz welaýatynyň Görogly etrabyndaky Çagalar we ýetginjekler döredijilik öýüniň «Deprekçiler» gurnagynyň ýolbaşçysy Orazjan Sapargeldiýew;
Şeýle hem bäsleşikleriň 15-siniň hersinde Aşgabat, Arkadag şäherlerinden hem-de Türkmenistanyň ähli welaýatlaryndan birinji, ikinji, üçünji orunlaryň we höweslendiriji baýraklaryň eýeleri mynasyp kesgitlenildi.
Bäsleşikleriň geçirilmegi nusgalyk bilim edaralaryny, olarda döredijilikli we netijeli işleýän iň gowy pedagogik işgärleri ýüze çykarmaga we höweslendirmäge ýardam etdi, şeýle hem gatnaşanlaryň zähmetsöýerligini, zehinlerini, pedagogik ussatlyklaryny, watançylygyny hem-de olaryň öz işlerini halkara ölçeglerine laýyklykda kämilleşdirmäge hemişe ymtylýandyklaryny görkezdi.
