10 – 11-nji iýunda Ylymlar güni mynasybetli Türkmenistanyň Oguz han adyndaky Inžener-tehnologiýalar uniwersitetinde «Oguz han uniwersiteti: zehin, innowasiýa, ösüş» atly utgaşykly görnüşli halkara ylmy-amaly maslahat geçirildi.

Iki günlük foruma dünýäniň 22 ýurtlaryndan, şol sanda Russiýanyň, Belarusuň, Özbegistanyň, Ýaponiýanyň, Türkiýäniň, Wengriýanyň, Awstraliýanyň, Hytaýyň, Şwesiýanyň, Finlýandiýanyň, Awstriýanyň, ABŞ-nyň, Indoneziýanyň we beýleki ýurtlaryň ýokary okuw mekdepleriniň, ylmy-barlag institutlarynyň, edaralarynyň we kompaniýalarynyň 50-den gowragynyň professorlary, mugallymlary, alymlary, ylmy işgärleri, hünärmenleri gatnaşdylar.

Halkara maslahatyň açylyş dabarasy baýramçylyk ýagdaýynda geçip, ýokary okuw mekdebiň döredijilik toparlarynyň aýdym-sazly çykyşlary bilen utgaşdy. Uniwersitetiň öňündäki giň meýdançada maslahata gatnaşyjylar türkmen halkyna mahsus bolan myhmansöýerlik bilen garşylandylar, hormatly myhmanlara türkmen milli tagamlary we süýjülikler hödürlenildi.

Soňra çärä gatnaşyjylara innowasion tehnologiýalaryň mazmunly sergisi görkezildi. Ol uniwersitetiň alymlarynyň, mugallymlarynyň we talyplarynyň ylymda gazanan üstünlikleri hem-de häzirki zaman ylmynyň möhüm ugurlarynda ýokary okuw mekdepde işjeň alnyp barylýan işler bilen giňişleýin tanyşdyrdy.

Emeli aň we kiberhowpsuzlyk, sanly we akylly tehnologiýalar, himiýa tehnologiýalary, lukmançylyk, biotehnologiýalar, genetika we bioinženeriýa, innowasion ykdysadyýet, tehnologik telekeçilik ulgamlarynda we beýleki ugurlarda görkezilen ylmy-barlag taslamalary hem-de işläp taýýarlamalar sergini synlanlarda uly täsirleri galdyrdy.

Maslahatyň açylyş dabarasynyň çäklerinde oňa gatnaşyjylaryň adyna gutlaglar we netijeli işlemek baradaky arzuwlar aýdyldy. Umumy mejlisde ylym, bilim, ykdysadyýetiň dürli ugurlaryna innowasion tehnologiýalary ornaşdyrmak ulgamlarynda ýurdumyzyň gazanan üstünliklerine bagyşlanylan tanyşdyrmalara aýratyn üns berildi. Ýokary tehnologiýalar babatda, ýurduň senagat kärhanalarynyň binýadynda nano-, bio- we maglumat ulgamlaryny ösdürmekde ykdysadyýetiň döwlet we hususy edaralarynyň arasyndaky gatnaşyklaryň netijeliligi barada aýdyldy. Bular baradaky çykyşlar ylmy täzeçilligi hem-de wajyplygy bilen tapawutlandy.

Häzirki zaman ylmynyň dürli ugurlarynda gazanylan netijeler bilen baglylykda, çykyşlarda Türkmenistanyň dünýäniň ýurtlary bilen parahatsöýüjilik, ynanyşmak we deňhukuklylyk ýörelgelerinde guraýan işjeň hyzmatdaşlygynyň eýeleýän orny nygtaldy. Bellenilişi ýaly, hormatly Prezidentimiziň berýän yzygiderli goldawlary netijesinde Türkmenistanyň Oguz han adyndaky Inžener-tehnologiýalar uniwersiteti daşary ýurtlaryň abraýly uniwersitetleri, öňdebaryjy kompaniýalar we ylmy merkezler bilen hyzmatdaşlygy işjeň ösdürýär. Häzirki günde ýokary okuw mekdep tarapyndan daşary ýurtly hyzmatdaşlaryň 25-si bilen hyzmatdaşlyk etmek hakynda resminamalara gol çekildi.

Ylym, bilim we innowasion tehnologiýalar ulgamynda halkara hyzmatdaşlygyň gerimini giňeltmek, şeýle hem ylmy açyşlary we üstünlikleri artdyrmak maksady bilen, maslahatyň çäklerinde täze ikitaraplaýyn resminamalaryň bäşisine:

– Türkmenistanyň Oguz han adyndaky Inžener-tehnologiýalar uniwersiteti bilen Dohanyň ylym we tehnologiýalar uniwersitetiniň (Katar) arasynda özara düşünişmek hakynda Ähtnama;

– Türkmenistanyň Oguz han adyndaky Inžener-tehnologiýalar uniwersiteti bilen Malaýziýanyň Tenaga milli uniwersitetiniň arasynda talyp alyş-çalşygy we mobillik maksatnamasy hakynda Ylalaşyga;

– Türkmenistanyň Oguz han adyndaky Inžener-tehnologiýalar uniwersiteti bilen «METABIO Biotechnology» kompaniýasynyň (Türkiýe) arasynda özara düşünişmek hakynda Ähtnama;

– Türkmenistanyň Oguz han adyndaky Inžener-tehnologiýalar uniwersiteti bilen Hytaýyň Şanhaý ylym we tehnologiýalar uniwersitetiniň arasynda özara düşünişmek hakynda Ähtnama;

– Türkmenistanyň Oguz han adyndaky Inžener-tehnologiýalar uniwersiteti bilen Hytaýyň Çanan uniwersitetiniň arasynda özara düşünişmek hakynda Ähtnama gol çekmek dabarasy geçirildi.

Taraplaryň gol çeken resminamalary hyzmatdaşlyk gatnaşyklaryny ösdürmäge we çuňlaşdyrmaga özara gyzyklanma bildirilýändigini tassyklady hem-de Türkmenistan bilen maslahata gatnaşyjy ýurtlaryň arasyndaky netijeli hyzmatdaşlygy we däp bolan dostlukly gatnaşyklary has-da giňeltmek boýunça bilelikdäki tagallalary birleşdirmek üçin berk binýat goýdy.

Halkara ylmy-amaly maslahatyň maksatnamasyna «Ylmy integrasiýa: tebigy we takyk ylymlarda ösüş»; «Nazaryýet we seljerme: ylmy pikirlenişe täze çemeleşmeler»; «Sanly tehnologiýalar: innowasiýa we akylly ulgamlaryň ösüşi» atly bölümçe mejlisleriniň üçüsi girdi.

Foruma gatnaşyjylar gymmatly tejribeleri alyşmaga, döwrebap bilim tehnologiýalaryny işläp taýýarlamak we ornaşdyrmak boýunça ylmy gazanylanlara, özleriniň wekilçilik edýän ýokary okuw mekdeplerinde, kompaniýalarynda we ylmy merkezlerinde alnyp barylýan ylmy-barlag hem-de ylmy-usulyýet işleriniň üstünlikli netijelerine garamaga we olary ara alyp maslahatlaşmaga mümkinçilik aldylar.

Maslahatyň geçirilmegi köp babatda häzirki zaman ylmynyň ileri tutulýan ugurlaryny ösdürmek, iň täze ylmy gazanylanlary öwrenmek boýunça milli tejribäni baýlaşdyrmaga ýardam etdi, şeýle hem halkara akademiki dialogyň ösdürilmeginde täze sahypany açdy.