Myrat Garryýew adyndaky Türkmenistanyň Döwlet lukmançylyk uniwersitetinde biologiýa boýunça olimpiadanyň jemleýji tapgyry we ýeňijileri sylaglamak dabarasy boldy. Bäsleşik Türkmenistanyň Garaşsyzlygynyň 35 ýyllygy mynasybetli ýurdumyzyň orta mekdepleriniň ýokary synp okuwçylarynyň arasynda geçirildi.
Bäsleşigiň netijeleri boýunça Ahal welaýatynyň Babadaýhan etrabyndaky ýöriteleşdirilen 19-njy orta mekdebiň 11-nji synp okuwçysy Garaýew Sähetmyrat birinji orny eýeledi.
Ahal welaýatynyň Babadaýhan etrabyndaky ýöriteleşdirilen 18-nji orta mekdebiň 12-nji synp okuwçysy Maksadowa Güljemal hem-de Mary welaýatynyň Türkmengala etrabyndaky 20-nji orta mekdebiň 12-nji synp okuwçysy Annamämmedowa Aýnur ikinji orny paýlaşdylar.
Lebap welaýatynyň Kerki etrabyndaky ýöriteleşdirilen 37-nji orta mekdebiň 12-nji synp okuwçysy Aşyrow Şanazar, Balkan welaýatynyň Balkanabat şäherindäki ýöriteleşdirilen 20-nji orta mekdebiň 12-nji synp okuwçysy Esenowa Aýlar we Daşoguz welaýatynyň Daşoguz şäherindäki ýöriteleşdirilen 10-njy orta mekdebiň 12-nji synp okuwçysy Atajanowa Mähri üçünji baýrakly orna mynasyp boldular.
Sylaglaýyş dabarasynyň barşynda ýeňijilere degişli derejeli diplomlar hem-de ýadygärlik sowgatlar gowşuryldy. Olimpiadada tapawutlanan okuwçylar Hormat hatlary we baýraklar bilen sylaglandylar.
Paýtagtymyzyň ýokary okuw mekdebiniň binýadynda geçirilen olimpiadanyň jemleýji tapgyry ýurdymyzyň dürli künjeklerinden zehinli okuwçylary bir ýere jemledi. Olar üçin Aşgabadyň gözel ýerleri boýunça täsirli we özüne çekiji gezelençler guraldy.
Bäsleşigiň biologiýa hem-de lukmançylyk ulgamyna aýratyn gyzyklanma bildirýän finalçylary ýurtda ýokary hünär derejeli lukman işgärleri taýýarlaýan öňdebaryjy bilim ojagy bolan paýtagtyň lukmançylyk uniwersiteti bilen giňişleýin tanyşmaga ajaýyp mümkinçilik aldylar. Okuwçylar uniwersitetiň hil derejesinde bilim almak, ýokary derejede okamak hem-de geljekki hünäri üstünlikli özleşdirmek üçin hemme zerur şertler döredilen döwrebap okuw otaglaryna, ylmy-barlag barlaghanalaryna, kafedralaryna baryp gördüler.
Ýokary synp okuwçylaryň arasynda biologiýa boýunça geçirilen olimpiada Myrat Garryýew adyndaky Türkmenistanyň Döwlet lukmançylyk uniwersitetiniň Türkmenistanyň Garaşsyzlyk gününe bagyşlanan her ýylky çäresidir. Guramaçylar has zehinli mekdep okuwçylaryny ýüze çykarmagyň, goldamagyň we okuwa çekmegiň, tebigy bilimler ulgamynda okuwçylary taýýarlamagyň hilini ýokarlandyrmagyň, ýaşlaryň okamaga bolan gyzyklanmalaryny höweslendirmegiň hem-de bu ugurda ýokary okuw mekdebiň ýurduň orta mekdepleri bilen ýakyn gatnaşyklaryny ösdürmegiň bäsleşigiň esasy maksatlarynyň hatarynda durýandygyny nygtaýarlar.
