Türkmenistanyň Daşary işler ministrliginiň Halkara gatnaşyklary institutynyň Ýaş diplomatlar mekdebi tarapyndan geçirilýän «Parahatçylygyň ýaş çaparlary» atly intellektual taslamasynyň VI möwsüminiň saýlama synagyna ýurdumyzyň ähli künjeklerinden 480-den gowrak türkmen mekdep okuwçylary gatnaşdylar.
Taslama gatnaşyjylaryň deslapky saýlama tapgyry ýurdumyzyň orta mekdepleriniň 10-njy, 11-nji we 12-nji synp okuwçylaryny bir ýere jemledi. Synag Türkmenistanyň taryhy, bütindünýä taryhy, Türkmenistanyň medeni mirasy, dünýä medeniýeti, iňlis dili, rus dili ýaly mekdep maksatnamasynyň dersleri boýunça taýýarlanan 100 sany ýazuw sowallaryny öz içine aldy. Mundan başga-da, okuwçylaryň logiki pikirlenmesine we seljeriş ukyplaryna baha bermek maksady bilen, synaga logika we IQ boýunça intellektual sowallar hem girizildi.
Saýlama synagynyň netijeleri esasynda täze möwsüme gatnaşjaklaryň düzümi dörediler. Oňa gatnaşmaga 64 okuwçy hukuk gazanar. Synagyň netijeleri Türkmenistanyň DIM-niň HGI-niň saýtynda yglan ediler, şeýle hem şol ýerde geljekde bäsleşik baradaky ähli möhüm maglumatlar ýerleşdiriler.
«Parahatçylygyň ýaş çaparlary» bäsleşiginiň VI möwsümi «Garaşsyz, Bitarap Türkmenistanyň daşary syýasaty: adamzadyň parahatçylygynyň we ösüşiniň bähbidine hyzmatdaşlyk» şygary astynda geçer.
Türkmenistanyň DIM-niň HGI-niň hem-de onuň düzümindäki Ýaş diplomatlar mekdebiniň hünäre ugrukdyryjy bu giň gerimli taslamasy altynjy okuw ýyly yzygiderli geçirilýär we ýurdumyzyň ýokary synp okuwçylarynyň arasynda barha uly meşhurlyga eýe bolýar. Intellektual bäsleşik öz ýurdunyň taryhyna, türkmen diplomatiýa mekdebiniň ösüşine we kemala gelmegine, şeýle hem Türkmenistanyň içeri we daşary syýasatynyň strategiýasyna hem-de onuň dünýä ýurtlary bilen diplomatik gatnaşyklaryna çuňňur gyzyklanma bildirýän iň zehinli, sowatly ýaşlary ýüze çykarmaga we çekmäge gönükdirilendir.
Mundan ozalky bäsleşige gatnaşan iň oňatlarynyň – onlarça ýaş zehinleriň häzirki wagtda Türkmenistanyň DIM-niň Halkara gatnaşyklary institutynda ýokary bilim alýandygy bu taslamanyň netijelidigini tassyklaýar.
