15-nji oktýabrda Daşkentde «Wakalar gözýetimi» atly XI halkara häzirki zaman sungat sergisiniň çäginde türkmen ussatlarynyň sergisi açyldy. P. Benkow adyndaky Respublikan ýöriteleşdirilen sungat mekdebiniň sergi meýdançasynda tanymal suratkeşler Azat Myradowyň, Gunça Myradowanyň we Toýly Çopanowyň çeken 30-dan gowrak suraty görkezildi.
Serginiň dabaraly açylyşyna köp myhman gatnaşdy, olaryň arasynda sungat işgärleri, bilermenler, sungat muşdaklary we okuw mekdebiniň talyplary bardy.
Suratkeş Toýly Çopanowyň belleýşi ýaly, suratlarynyň baý akademiki däpli bu mekdepde görkezilmegi türkmen wekiliýeti üçin uly abraýdyr.
– Biz ýaş kärdeşlerimize realistik suratlar we janly milli öwüşginler arkaly häzirki zamanda dünýä kynçylyklaryna we depginine, hakykatdan çuňňur düşünip boljakdygyny görkezmäge çalyşdyk.
Görkezilen işler türkmen halkynyň ruhy we medeni mirasyny, taryhyny hem däp-dessurlaryny häzirki zaman suratkeşleriniň nukdaýnazaryndan beýan edýär. Her bir surat ýordumynda manylaryň eriş-argaçlygy we döwürleriň özara baglanyşygy görünýär, şeýle hem öz halkyň taryhyny bilmegiň aýratyn ähmiýetini nygtaýar.
Munuň netijesinde nesiller we medeniýetler arasyndaky gatnaşyk örän janly boldy. Serginiň baş ýörelgesi "Wakalaryň gözýetimini" belli bir geçmiş bilen näbelli geljegiň arasyndaky öwrülişik pursady hökmünde, şeýle hem tehnologiýanyň ösüşi hem emeli aň döwründe ynsan bitewüliginiň gözlegi barada oýlanma hökmünde aňlanylýar.
Bu döredijilik çekişmesi güýçli akademiki binýadyň islendik häzirki zaman sungatynyň we ýörelge gözleginiň düýp esasy bolup galýandygyny subut edýär. Suratkeş Azat Myradow nusgawy mekdebiň hemişelik gymmatyny şeýle sözler bilen nygtady:
– Akademiki esas çäklendiriji çarçuwa däl-de, döredijilik azatlygy üçin mäkäm esas we goldawdyr. Ussat diňe kompozisiýa, öwüşginlik we surat çekmegiň takyklygy ýörelgelerini özleşdirmek arkaly iň batyrgaý häzirki zaman pikirlerini ynamly we ygtybarly beýan etmek mümkinçiligine eýe bolýar.
XI halkara sergä 33 ýurtdan häzirki zaman sungatynyň esasy ugurlary – surat çekmek, grafika, heýkeltaraşlyk, gurama sungat, wideo sungaty, fotosuratçylyk we ýörelgewi sungat ýaly ugurlarda işleýän jemi 70 suratkeş we gözegçi gatnaşýar. Bu giň gerimli medeni çäre Özbegistanyň Çeperçilik akademiýasy we Çeperçilik sergiler müdirligi tarapyndan guraldy.
Serginiň giň maksatnamasy çeper çykyşlary, ussatlyk sapaklaryny we halkara ylmy-amaly maslahaty öz içine alýar. Özbegistanyň Garaşsyzlygynyň 35 ýyllygyna bagyşlanan «Çarhpalak» sergisi aýratyn möhüm waka boldy. Bu maksatnama Samarkanda syýahat-da girýär, bu bolsa myhmanlara häzirki zaman sungatyny hem ýurduň baý taryhy hem medeni mirasyny öwrenmäge mümkinçilik berýär.
