Gündogaryň dana şahyry Magtymguly Pyragynyň doglan gününiň 300 ýyllygy mynasybetli Türkmenistanyň telekommunikasiýalar we informatika institutynyň Türkmenistanyň Bilim bilim ministrligi bilen bilelikde talyplaryň arasynda guran breýn-ring ̶ paýhas oýnunyň jemleýji tapgyry 8: 7 hasabynda Döwletmämmet Azady adyndaky Türkmen milli dünýä dilleri institutynyň toparynyň peýdasyna tamamlandy.
TMDDI-niň topary breýn-ring ̶ paýhas oýnunyň jemleýji tapgyrynyň netijelerine görä ýeňiji boldy we birinji orny eýeledi. Oýnuň soňky tapgyrynda bu ýokary okuw mekdebiniň bäsdeşi - Türkmen döwlet ykdysadyýet we dolandyryş institutynyň topary ikinji orna mynasyp boldy.
Ýarym finalda Seýitnazar Seýdi adyndaky Türkmen döwlet mugallymçylyk institutynyň we Daşary işler ministrliginiň Halkara gatnaşyklary institutynyň toparlary üçünji baýrakly orun ugrunda bäsleşdiler. Duşuşykda Halkara gatnaşyklary instituty çala tapawut bilen ýeňiş gazandy we oýnuň bürünç medalyna mynasyp boldy.
Bir aýa golaý dowam eden breýn-ring ̶ paýhas oýny dört tapgyrdan ybarat boldy. Saýlama tapgyrda sekiz oýun geçirildi, olaryň hersinde ýurdumyzyň 16 ýokary okuw mekdebine wekilçilik edýän toparlar çykyş etdiler. Çärýek finalda 8 toparyň gatnaşmagynda dört oýun geçirildi. Olaryň 4-si ýarym finalyň iki oýnunda, 2-si bolsa finalda ̶ jemleýji tapgyrda çykyş etdiler.
Ýokary okuw mekdepleriniň talyplarynyň gatnaşmagynda geçirilen aň-paýhas oýny çyn zehinleriň bäsleşigine, şeýle hem täsirli tomaşa we çärä gatnaşanlaryň ählisi üçin hem ýatdan çykmajak duşuşyga öwrüldi. Oýun dartgynly bäsdeşlik ruhunda geçdi, oňa gatnaşanlar toparlarynyň çykyşlarynda üstünlikler arzuw etdiler, oýnuň gidişine dykgatly syn etdiler, alyp baryjynyň sowallaryna dessine jogap berdiler we ynamly çykyşlary bilen düşünjeleriniň giňdigini görkezdiler.
Türkmen halkynyň beýik ogly Magtymguly Pyragynyň ömrüne we döredijiligine bagyşlanan gyzykly hem-de ýatdan çykmajak tasir galdyran oýnuň ýokary guramaçylyk derejesinde guralandygyny we geçirilendigini aýtmak gerek.
