Türkmenistanyň medeniýet we bilim pudagynyň wekilleri Özbegistanyň Hywa şäherinde geçirilen Türki dünýäsiniň Medeniýet forumynda uly üstünlik gazandylar. Forum – «Täze Özbegistanda bagşyçylyk sungaty: häzirki zaman barlaglary we geljegi» atly giň gerimli çäräniň çäginde geçirildi. Hywa 40-dan gowrak ýurduň 200-e golaý wekili geldi.
Ýurdumyzda Daşoguz welaýatynyň M.Garlyýew adyndaky ýöriteleşdirilen sungat mekdebiniň saz taryhy we taglymaty bölüminiň müdiri, ýokary derejeli mugallym Şirin Allabaýewa we Türkmenistanyň at gazanan bagşysy, Daşoguzyň çagalar sungat mekdebiniň mugallymy Almagül Nazarowa wekilçilik etdiler.
Şirin Allabaýewanyň maslahatyň bölümleriniň birinde eden çykyşy foruma gatnaşyjylaryň arasynda uly gyzyklanma döretdi, olaryň arasynda ýokary okuw mekdepleriniň ençemesiniň alymlary we dürli ýurtlaryň görnükli medeniýet işgärleri bardy. «Dessançy bagşylar sungatynyň türkmen aýdym-saz mirasynyň taryhynda tutýan orny we ähmiýeti» temasyndan çykyş eden Ş.Allabaýewa türkmen bagşyçylyk mekdebiniň žanr we ýerine ýetiriş aýratynlyklaryny hem-de saklanyp galan halypa-şägirt däplerini açyp görkezdi. Bu sungatyň iň görnükli wekili Şükür bagşynyň mysalynda ol ýaş bagşylary ýetişdirmäge täsir edýän ýagdaýlary hem belledi. Öz çykyşynda Ş.Allabaýewa türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň işlerine salgylandy.
Almagül Nazarowa hem forumda Ş.Allabaýewa ýaly uly üstünlik gazandy, ol ussatlygy bilen bagşylar bäsleşiginde birinji ýeri eýeledi.
Daşoguz welaýatynda bagşyçylyk sungaty, şol sanda dessançy bagşyçylyk medeniýetiň has ösen we güýçli ugurlaryndan biridir. Mysal üçin, bu ýerdäki ýöriteleşdirilen çeperçilik mekdebine türkmeniň görnükli bagşysy Magtymguly Garlyýewiň ady dakyldy. Daşoguzlylar ussat dessançylaryna we sazandalaryna buýsanýarlar, Gündogaryň köp rowaýatlarynda ady agzalýan beýik taglymatçy-alym Aşyk Aýdyň piriň sarpasyny belent tutýarlar. Ruhubelent etrabynyň çäginde ýerleşýän Aşyk Aýdyň piriň aramgähiniň gapdalynda piriň we türkmen dutarynyň heýkelleri guruldy. Şeýle hem Daşoguzda 1992-nji ýylyň dekabryndan bäri özboluşly bagşylar muzeýi bar.
Hywadaky forumyň jemi boýunça Türkmenistanyň wekiliýetiniň agzalaryna dabaraly ýagdaýda degişli şahadatnamalar we gymmat bahaly sowgatlar gowşuryldy.
