Türkmenistanyň Medeniýet ministrliginiň Sergi merkezinde iki suratkeşiň —Merdan Kakabaýewiň we Azat Tuwakowyň işleriniň sergisi açyldy.
Bilelikdäki sergä şu ýyl olaryň 45 ýaşynyň dolmagy sebäp boldy, çünki bu ýaşda nakgaş hünär taýdan kämillige ýetýär. Merdan Kakabaýewe kärdeşleri degişme bilen köpugurly nakgaş diýýärler. Sebäbi ol diňe saýlan temasyndan bir surat çekmek bilen çäklenmeýär. Onsoň onuň suratlary tapgyrlaýyn çykýar.
Merdan Kakabaýewiň köp zat bilen gyzyklanýandygyny bellemeli. Çagalykdan arheolog bolmagyň arzuwyndady: ýer astyndaky syrly zatlar özüne çekýärdi. Suratkeş bolansoň hem arheologiki tapyndylara gyzyklanmasy ýitmedi: Merdan Kakabaýewiň natýurmortlarynda has gymmatly artefaktlara duş gelýäris. Artefaktlaryň köplügi üçinem onuň natýurmortlary ýurdumyzyň arheologiýasy boýunça okuw gollanmasy bolup biljek.
Bir gezek halk saz gurallary Merdan Kakabaýewiň natýurmortlarynda peýda boldy, soňra dessançy bagşylaryň portretleri döredi. Şeýdibem Merdan Kakabaýewiň aýdym-saza bagyşlanan suratlarynyň tapgyry döredi. Ýöne nakgaşyň has tapawutly aýratynlygy Türkmenistanyň Döwlet çeperçilik akademiýasynda okaýan döwri köteklenen arassa reňkleridi, oňa tebigatda beýle reňkleriň bolmaýandygyny aýdýardylar. Ýöne ol öz ýolundan dänmedi, häzirki wagtda Merdan Kakabaýewiň bakja natýurmortlary henizem açyk reňkleri bilen sergä gelýänleri begendirýär. Merdan Kakabaýew “Täze Daşoguz” suratynda ýaşamaga, işlemäge we çaga ýetişdirmäge amatly häzirki zaman şäheri – ýurdumyzyň geljegini suratlandyrdy.
Sergä gatnaşan beýleki nakgaş Azat Tuwakow žiwopisçiden gaýry grafikdir. Sungat öwrenijiler Azadyň takyk surat çekýändigini belleýärler. “Toý ýörişi” grafiki işinde arabadaky gelni, myhmanlar we sazandalar bilen däp bolan toý dabarasynyň şatlygyny görkezýär. Daş-töweregimizdäki dünýäni şöhlelendirýän ýagyş damjalarynyň “Damja” suratyndaky filosofiki manysy nakgaşyň ýönekeý adamlardan tapawutlylykda ýönekeý zatlarda has üýtgeşik zat görüp bilýänligi bilen özüne çekýär.
Azat Tuwakowyň tomaşaçylary uzak wagtlap eglendirýän grafiki işlerinden biri “Güýz” suratydyr. Onda uzyn saçly tans edýän gyz şekillendirilýär. Gyzyň kaddy-kamaty leýlisaça meňzeýär, emma onuň dakynan tumary we beýleki zatlary bu daragty ýatladýan gyzyň bihal däldigini görkezýär. Suratkeş işine “Güýz” diýip at beripdir, bu hem Azat Tuwakowyň keramatlylyk bilen ýylyň bir pasly ýaly düşünjeleri utgaşdyrmagynyň sebäbi hakda oýlanmaga mejbur edýär.
Iki türkmen suratkeşiniň suratlarynyň sergisi 16-njy maýa çenli açykdyr.
