Şu günler paýtagtymyzda Gazagystan Respublikasynyň Medeniýet günleri geçirilýär. Munuň özi iki dostlukly ýurduň arasyndaky medeni hyzmatdaşlygyň hil taýdan täze derejä çykarylýandygynyň aýdyň beýanydyr. Mälim bolşy ýaly, şu ýylyň iýunynda ýurdumyzyň medeniýet we sungat işgärlerinden ybarat wekilçilikli topar Türkmenistanyň Medeniýet günleriniň çäklerinde doganlyk gazak halkyny Watanymyzyň medeni-ynsanperwer ulgamda gazananlary bilen tanyşdyrdy. Bu gün bolsa türkmen paýtagty Gazagystanyň medeniýet işgärlerini garşylady.

Türkmenistanyň talyplarynyň dördüsi maliýe howpsuzlygy boýunça IV Halkara olimpiadada baýrakly orunlary eýelediler. Bäsleşigiň jemleýji tapgyry Russiýanyň Soçi şäherindäki «Sirius» federal çäklerde geçirildi.

Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky «Arkadagly Ýaşlar» atly elektron žurnalynyň täze sany okyjylara ýetirildi. Mukaddes Garaşsyzlygymyzyň çawy dünýä dolan 33 ýyllyk toýy we Türkmenistanyň Halk Maslahatynyň ýakynda geçirilen mejlisinden gelip çykýan wezipeler neşiriň güýzüň ilkinji aýyndaky sanynyň esasy aýratynlyklarydyr.

Hepdäniň başynda ýurdumyzyň ýaşaýjylaryna maýyl howa garaşýar. Birnäçe ýerlerde gysga wagtlaýyn ýagşyň ýagjakdygyna garamazdan, gündizlerine howanyň temperaturasy +32 gradus töwereginde bolar.

Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 18-si hasaba alyndy.